Geassemánu 9 beaivvi leat EU-parlameantaválggat ja dán gaskavahku vástidedje njeallje bellodaga EU-evttohasat jienasteaddjiid jearaldagaid SVT-prográmmas Toppkandidaterna.
Oasseváldit ledje Helene Fritzon (S), Alice Bah Kuhnke (MP), Alice Teodorescu Måwe (KD) ja Karin Karlsbro (L)
Okta gii beasai jearahallat sin lei Sáminuorra sátnejođiheaddji Sara-Elvira Kuhmunen. Son jearai: ”Galgá go EU:a áidna dovdastuvvon eamiálbmot oaffaruššot dan ruoná nuppástusa nammii?”
Son oaččui sierra vástádusaid politihkkariin.
-Mon njuorasmuvan du jearaldagas ja vástádus lea: Ii, min eat galgga oaffaruššat sámi eamiálbmoga dan ruoná nuppástusa dihte. Min fertet beluštit min áidna eamiálbmoga, dajai Kuhnke.
”Gávdnojit olu váttis soahpameahttunvuođat”
Eará politihkkarat čalmmustahtte man dehálaš dat ruoná nuppástus lea.
-Min dárbbašit oktasaš ruvkkestrátegiija EU:as danne go min dárbbašit metállaid ja minerálaid vai sáhttit čađahit dan ruoná nuppástusa, Juohke riika galgá maid mearridit dáin proseassaid, dajai Helene Fritzon.
-Jos mii joatkit sisafievrridit eará riikkain de mii eat dieđe movt sii rogget daid ávdnasiid. Danin mii hálidit váldit eambbo ovddasvástádusa ja lasihit ođđasit sávkkástallama. Muhto loahpaloahpas mii dárbbašit ávdnasiid el-biillaide, mobiltelefovnnaide ja eará diŋggaide servvodagás ja mon anán ahte mii buohkat fertet dovddástit ahte dat gávdnojit olu váttis soahpameahttunvuođat, dalle mii fertet válljet dan mii lea eanemus bisttevaš, dajai Karin Karlsbro (L).
Maŋŋel digaštallama oaččui Sara-Elvira Kuhmunen jearaldaga jos son lea duhtavaš vástádusain.
-Lea váivi go eai sáhte addit čielga vástádusaid, eaige čuoččut eamiálbmotvuoigatvuođaid ovddas, dajai son.