Kokaiidna lea viđa jagis hirbmadit leavvan Norrbottenii, dán almmuhit leana guovllu- ja narkotihkkabolesat. Ruhta ja gudni leat earret eará duogážin dasa.
– Soaitá go kokaiidna lea divrasat ja das lea eanet stáhtus. Kokaiidna vuovdit eai dárbbaš nu stuorra hivvodagaid gieđahallat ja seammás dinejit eanet ruđa, čilge, narkotihkkaboles gii háliida leat anonyma.
Vuolleahkásaččat geavahit kokaiinna
Ovdal leamaš amfetamiidna dábálaš feastagárrenávnnas davvin, muhto dál leat álgán kokaiinna geavahit. Dát vuorjá Luleju- ja Bodena guovllubolesiid go vuolleahkásaččat vavdet dasa.
– Mii oaidnit ahte 13 jahkásaš mánát geahččalit kokaiinna. Dan eat oaidnán go bolesin álgen moatte jagi áigi, muitala guovlluboles Martina Renholm.
Skuvlla áiggi gárremin
Mo fuomášeiddet dan?
– Váhnemat dat leat váldán oktavuođa minguin, muhto maiddái oahpaheaddjit ja rektorat go vihkkut soapmása skuvllas gárremin.
Man dábálaš lea dát vuolleahkásaččaid gaskkas?
– Eat dieđa man ollus leat, muhto mii gávdnat muhtun ráje. Sosiálabálvalus oaidná eanet go vuolleahkásaččat S lea sin ovddasvástádus, dadjá Renholm.
Ná fidnejit vuolleahkásaččat gárrenávdnasiid
Guovllubolesat ávžžuhit olbmuid čuovvut mielde mii dáhpáhuvvá – eandalii váhnemiid.
– Váhnemat fertejit čuovvut nuoraideaset. Mánáid bearráigeahččan lea dehálaš go dat leat rašis agis ja lea ollu mii geavvá, muitala Martina Renholm.
Videos muitala guovlluboles, mo sii navdet vuolleahkásaččaid fitnet gárrenávdnasiid.