Rahpandoaluid dolle Johkamohki Ája girjerájus. Doaluide ledje boahtán Norgga, Ruoŧa ja Suoma riikavuorkkáid hoavddat. Maiddái Norgga Sámi arkiivahoavda ja Norrbottena leanahearrá vel.   

– Dál lea dehálaš iešguđet riikkain fuomášuhttit min neahttasiiddu. Vai oidnet ahte dat gávdno, leanahearrá Lotta Finstorp sártnistis.   

”Vuorkkát leat dehálaččat”  

Vuorkáneahttasiiddus leat 32 vuorkká, girjeráju ja musea dávvirat miehtá Eurohpá. Neahttasiidu lea ovttasbargu Norgga, Ruoŧa ja Suoma Riikavuorkkáin ja Norgga ja Suoma Sámi vuorkkáin.   

– Vuorkkát leat dehálaččat ja neahttasiidu dagaha vejolažžan vuorkkáid seailluhit boahtte áigái, dadjá Riikaarkiiva riikavuorkká hoavda Karin Åström Iko.  

Norgga ja Suoma riikavuorkká hoavddat lea ovtta oaivilis.   

– Davviriikka ovttasbargui lea dát stuorra dáhpáhus. Doaivumis bidjet dieđuid neahttasiidui, lohká Norgga riikavuorkká hoavda Inga Bolstad.   

”Na leš oaidnit mo dat doaibmá”  

Norgga Sámi vuorkká hoavda Inga Marja Steinfjell muitala ahte ii leat álki gávdnat Eurohpá vuorkkáin danin leat čohkken dieđuid ovtta sadjái. Dat ii leamaš álkes bargu ja eatge leat geargan bargguin vel. Ulbmi lea dađistaga bidjat dieđuid vuorkái.   

– Mun sávan ahte olbmot geavahišgohtet dan dál. Go olbmot geavahit dan, de mii oaidnit mo dat doaibmá. Dasto sáhttit ovdánahttit ja buoredit neahttasiiddu, muitala Inga Marja Steinfjell.  

Davvi riikkaid ovttasbargu lea bures doaibman. Muhto Inga Marja Steinfjell váillaha Sámi vuorkká Ruoŧas, nugo Norggas ja Suomas.   

Ruoŧas ii leat Sámi arkiiva  

Jagi 2019 arkiivaguorahallamis Ruoŧas namahuvvui sámi arkiiva. Jurdda lei ahte Sámediggi galggai guorahallat dán. Ášši ii leat ovdánan dan rájes. Karin Åström Iko oaivvilda ahte lea oaivvilda ahte sámit beroštit áššis.   

– Livčče buorre jos soapmásis lea bargun guorahallat sámi arkiivva Ruŧŧii. Nu go mun oainnán dan, de ii ásahuvvo sámi arkiiva Ruŧŧii lagamus áiggis, dadjá Karin Åström Iko.