30 beaivvi borgemánus galggai sámediggi doallat liige digitálalaš dievasčoahkkima, beaivvi ovdal go áigemearri dievvá vástidit movt čearuid siskkáldas organiseren galgá doaibmat.   

Dievasčoahkkimis Árviesjávrries dás giđđat sáddejuvvui ášši gulaskuddamii  go stivrra evttohus hilgojuvvui.  

Sávve geargat vástidit

31 beaivvi borgemánus lea ráđđehus bivdán vástádusa gulaskuddanásahusain  ja jurdda doallat liige čoahkkima leai ahte sámediggi dattege livččii geargan vástidit.   

9 beaivvi borgemánus lea stivrras leamaš oktavuohta opposišuvnnain ja dalle čujuhedje ahte ii dárbbaš vuordit vástádusa.  

-Čujuhedje ahte galge lihkkidit ášši ja dalle ii lean gánnáhahtti doallat liigečoahkkima, dadjá Håkan Jonsson, Bivdo ja Guolástansámit.   

Opposišuvdna lea duhtavaš go ii šatta liigečoahkkin.  

”Eanet áigi lea buorre”

-Lea buorre go mii dárbbašit áiggi digaštallat, lea dan mađe deaŧalaš jearaldat, dadjá Marita Stinnerbom, Guovssonásti.   

Su mielas ii leat heahti ahte cealkámuš čearuin easka addo skábmamánus seammás go Láidunlávdegoddi joatkka barggus.   

Lea dan mađe deaŧalaš ášši ahte min oainnut vuhtiiváldojuvvojit vaikko ožžot cealkámuša skábmamánus.   

Jonsson áššedovdi

Stivrajođiheaddji šálloša ahte cealkámuš ii boađe ovdal áigemearri dievvá.   

-Lean Láidunlávdegottis áššedovdi ja boađán muitalit movt ášši lea ja makkár evttohus stivrras lea, dadjá Jonsson.  

Sámediggi bivddii ráđđehusas guhkibut cealkináiggi maŋŋel go ášši sáddejuvvui gulaskuddamii álgogeažis geassemánus.   

Disdaga bođii diehtu Báikegotte- ja infrastruktuvradepartemeanttas ahte leat ain meannudeami ášši.