Maŋŋelgo njeallje jagi lea čohkkán opposišuvnnas, de Marianne Gråik mielain muitala man vearrut Sámedikki stivra lea bargan. Lean váivašuvvan, son čilge, geahččat go stivrejit.
Bellodat livččii sáhttit leat stivrras. Bellodat jođihii Sámedikki ovttas bellodagaiguin Vuovdega, Guovssonásti ja Samerna mandáhttaáigodaga 2017–2021. Maŋŋel válggaid livččii dát ovttasbargu sáhttit joatkašuvvat, muhto bellodagat eai soabadan vaikko čoahkkinaste máŋgii.
Mot dál jurddašat go ehpet beassan šat stivret?
– Lea álki dál dadjat ahte livččiimet galgat juoidá dahkat iežá ládje. Mearrádus váldui dalle daid dieđuid jelgii mat ledje. Mearrádus šattai ná, ii gánnát šat gáhtat, čilge Marianne Gråik.
Bealušta čearuid
Sámiid Riikkabellodat lea hárjánan leat Sámedikki stivrras. Ovdalgo bellodat Jakt- och Fiskesamerna stuorui 2000-logus, de lei Sámiid Riikkabellodat stuorimus bellodat. Eanemus sis leat leamaš logi mandáhta, jagi 2001 válggaid maŋŋel, ja dál sis leat guhtta mandáhta.
Bellodat deattuha ahte sin áigumuš lea ovddastit olles Sámi.
– Mis leat badjel 100 doaibmaevttohusa nannen dihte olles sámi servvodaga. Leat evttohusat mat váikkuhit máŋga fáddásuorgái nugo giela, kultuvrra, ealáhusaid, organisašuvnnaid, boazodoalu, dásseárvvu, eamiálbmotrivttiid ja nu viidásit, muitala Gråik.
Sis lea čielga oaidnu váttis jearaldahkii gii galggalii beassat miellahttun čearrui. Sámiid Riikkabellodat lea garas dainna ahte čearut ieža galget beassat mearridit vejolaš rievdadusaid, ja dan ii oaivvil Sámedikki dálá stivra.
– Mii meidnet ahte lea dehálaš ahte ealáhusas, masa dát guoská, lea stuora sadji digaštallamiin dás ovddos. Leat sii geat galget jođihit digaštallamiid. Čearut galget ieža mearridit mot dát ášši ovdána, deattuha son.
Geažuha ođđa ovttasbargui
Dál Marianne Gråik háliida fas stivrii. Vaikko bellodat Vuovdega ovttasbargá Jakt- och Fiskesamerna -bellodagain dán mandáhttaáigodaga, de son geažuha ahte sáhtálii joatkit ovttasbarggu mii sis lei ovdal maŋemus válggaid.
– Fertet vuordit válgabohtosiid ja de oaidnit. Mis leat dat ovttasbargobellodagat mat maŋemus maiddái ledje. Nugo oainnán sin bellodatprográmmain, de eai oru rievdadan iežaset politihka ilá ollu, dadjá son.