13 jahkásaš Ellá Márge Nutti lea hárjánan jietnaneavttár. Son lea earret iežá gullon dego nuorra Anna Jikŋon filmmas ja Selma juovlakaleandaris. Dal son lea áigeguovdil ođđa filmmas, Gumpehámis, mii vuosehuvvo vuosttaš gearddi sámegillii dán vahkkoloahpa.
– Dat lea hui gelddolaš ja dat lea obba somá ahte mon beasan dohko vuolgit, dadjá Ellá Márge Nutti.
Rámiduvvon filbma
Gumpehámis lea rámiduvvon filbma mii lea ožžon máŋga bálkkašumi. Filbma lea nieiddaža birra gii háliida áhčis veahkehit bivdit gumppiid, muhto ii oaččo. Son njáhká de olggos ijas ja vuovddis son deaivvada movttegis nieiddain, gii ijas nuppástuvvá gumpen.
Ella Márge Nutti neaktá gumpenieidda Mebh ja su mielas lea buorre go eanet mánáfilmmat bohtet sámegillii.
Háliida joatkit dubbet
– Mon gehččen beare ruoŧagiellafilmmaid go ledjen unni, dalle eai measta gávdnon sámegiel filmmat, dadjá Ellá Márge Nutti.
Son joatká:
– Muhto dal leat boahtán eanet ja eanet ja dat lea hui somá.
Su niehku lea joatkit dubbet filmmaid sámegillii ja son muitala ahte sus leat muhtin barggut vuordimis.
”Dehálaš válljet buori filmmaid”
Buvttadeaddji Lisa Marie Kristensen dadjá ahte boahtteáiggis lea áigumuš dubbet 2-3 filmma jahkái.
– Munnje lea dehálaš válljet buori filmmaid main lea buorre kvaliteahta.
Lávvordaga ja sotnabeaivvi Gumpehámis lea oaidnimis Tiff jr festiválas ja golggotmánu čihččet beaivvi rájis vuosehuvvo bioin.
Eanet filmmat boađi boađi
– Dal lean speanta oaidnit mo mánát váldet vuostá dan ja oaidnit gokko sii boagustit, dadjá Lisa Marie Kristensen.
Son muitala maiddái ahte leat moadde dubbejuvvon filmmat mat leat boađi boađi, earret iežá Mamma Mu, Eanni Mu, mii vuosehuvvo čakčamánu ovccát beaivvi rájis.