Guđa termiinna guhkkosaš kursa lea lágiduvvon Geavtses Sámi giellaguovddáža bealis ja lea leamaš hástaleaddji máŋgasii.
Giella man máttut ledje gildojuvvon oahppat lea šaddan oktavuohtan sin iežaset sogaid historjái.
-Dovdu stuorisin, dovdu dehálažžan, dadjá Helena Isaksson gii oahpahallagođii giela aiddo ovdalaš go devddii guhttalogi.
Beavddi alde leat bábirbihtážat maidda leat čállon iešguđege pronomenat. Vearbasojaheamit mat eai álo leat nu logalaččat ja seammaláganat. Sihke Simona ja Helena ruohttasat leat Giertsjávrries, Suárssas, muhto goappašagat orruba Ubmejes.
-Letne dahkan dán ovttas, dadjá Helena.
Gáibida giellalávguma
Dehálažžan giellaoahppamii leat leamašan sierra deaivvadeamit gos leat beassan ovttas geavahit giela. Vaikko leat olu lohkan ruovttus de oaivvildeaba goappašagat, ahte deháleamos lea hállat ja gullat giela.
Ja ain eambbogat leat gávdnagoahtán ubmisámegiela.
-Lea váttis dadjat man gallis hállet ubmisámegiela dasgo leat iešguđege dásis. Muhto dieđan eambbosiin leat stuorra beroštumi dahkat seamma mátkki mas moai letne dál, dadjá Helena Isaksson.
Vearbagirji boahtimin
Mannan vahkus ávvudedje kurssa čađaheami gáhkuin ja suohttasiiguin Geavtses.
-Lea máilmmi somá, muhto dál easkka álgá bargu, dadjá Simon Forsmark.
Son áigu doalahit giela oahpaheami bokte, go galgá oahpahit vuolit dási ohppiid gáidosis Likšus. Dasa lassin lea mielde almmuheamin ođđa oahppogirjjiid, nugo vearbagirjji ja giellaoahppagirjji mii almmuhuvvo vel dán jagi.
Maiddái su bearrašis lea eambbogiin miella lohkagoahtit giela, mii vel moadde buolvva dassái lei diehttelas.
-Min oahpaheaddji Sara Helene Persson lea bargan rámálmas barggu, mii leat nu ilus, dadjá Helena Isaksson.