Amnesty international almmuhii iežas jahkečilgehusa gaskkavahku. Das leat guorahallan got 155 riikka leat váldán vuhtii olmmoslaš vuoigatvuođaid mannan jagi.

Okta oassi maid loktejit, das mii guoskká Ruŧŧii, lea ahte ruvkkit, meahccečuollamat ja bieggamillohuksemat leat dagahan ahte deaddu lea lassánan sámi árbevirolaš eatnamiin. Daid váttisvuođaid lea maid ON lokten ovdalažžat dán jagi.

Čilgehusas čállá Amnesty: ”Seammas ii leat dat ráddjejuvvon suodjaleapmi doarvái buorre. Áiggi mielde uhkkiduvvo sámi kultuvra”.

Tilda Pontén, Amnesy International Sverige juristta, lea okta dain gii lea čállán dán čilgehusa.

– Mii oaidnit ahte Ruoŧa láhkaásaheapmi ii leat doarvái nanus das mii guoskká sámi álbmoga vuoigatvuođaid suodjaleapmái. Dán lea ON ja iežá gaskkariikalaš orgánat cuiggodan máŋgii.

Hálidit oaidnit ođđa láhkaásaheami

Danin hálida ge Amnesty dal oaidnit ođđa láhkaásaheami Ruoŧas.

– Mii vuordit ahte Ruoŧa stáhtta válda iežas gaskkariikalaš geatnegasvuođaid duođalažžat ja nanne sámiid vuoigatvuođaid suodjaleami, earret iežá ođđa láhkaásaheamiin mii dáhkida sámi njulgosa eatnamiidda ja maid friddja ja dieđihuvvon ovdalgihtii mieđáhusa.

Deaddu sámi árbevirolaš eatnamiin lea maid lassánan dálkkádatrievdadeamiid geažil. Das mii oaidnit ahte sámit fertejit beassat oasalasttit eanet boahtteáiggis.

– Mii vuordit ahte sámi álbmot ja sin vuoigatvuođat ovttastahttojuvvot nugo oassin servvodaga nuppástuhttimis. Nu ahte stáhtas lea ságastallan sámiiguin, ahte stáhtta sihkkarasttá ahte sámi álbmot lea oasálaš ja ahte váldá vuhtii sámiid árbevirolaš máhtu, dadjá Pontén.