Lávdedáiddár, bagadalli, dramaturga ja áktivista Åsa Simma lea nammaduvvon gudnedoavttirin Stockholmma universiteahtas. Son lea leamašan beaivválaš jođiheaddji ja dáiddalaš jođiheaddji Giron Sámi Teáhteris 2015 rájes.

– Go mon ožžon daid dieđuid de in gal jáhkkán ahte dat lei duohta. Mon jurddašin ahte dat lea soamis gii mu dájuha, de viimmat de gal jáhkken. Dat lea hui somá ja mu mielas dat lea hui somá ahte mis leat sámi dáiddárat geat ollejit dan akademalaš birrasii vaikko mii bargat oba praktihkalaččat, nu movt mon dagan, dadjá Simma.

Vuođuštusas čállet ahte Simma lea máŋgalot jagi leamašan njunuš jietna sihke sámi ja riikkaidgaskasaš lávdedáidagis.

– Åsa Simma lea dávjá oahpahan studeanttaid teáhterdiehtagis Stockholmma universiteahtas. Dat lea ávkin nuoraide konkrehtalaččat ipmirdit sámi kultuvrra. Su máŋggagielat vuohki ja praktihka čatná ovttas sihke dálá dutkama fáttas ja kursaovdáneami, ovdamearka dihte dramaturgiijas, dadjá Dirk Gindt, professor teáhterdiehtagis giella- ja kulturinstitušuvnnas ja joatká:

– Son lea ealli ovdamearka dasa ahte teáhterdiehtaga hállu bargat ovttas lávdedáiddáriiguin lea guovttebealat ságastallan lávdedáidaga kultuvrralaš ja sosiála mearkkašumi birra.