Ulf Nårsa čálii kommentára dalle go Jakt- och fiskesamerna almmuhedje Facebooksiidus ahte sii leat ilmmuhan Lars Miguel Utsi poliissaide.

”Leai suddu go ilmmuhusas ii šaddan mihkkege. Bolissat ja áššeguoddi dieđihit ahte sii eai gieđahala ášši. Su galggálii goddit”.

Nårsa searvá samediggeválggaide Jakt- och fiskesamerna ovddas. Sámedikki stivraságadoalli Håkan Jonsson ja bellodaga almmolaš Facebookkontu ledje jođánat liikostit dan kommentára.

Nårsa ii áiggo čilget

Čugget olbmo bastilis sákkiin lea dološ vuohki goddit dakkáriid geat leat dubmejuvvon jápmimii. Go SVT Sápmi jearrá Ulf Nårsas maid son oaivvilda dáinna de son ii háliit vástidit.

– Mon in háliit vástidit, dadjá son.

Håkan Jonsson, guhte jođiha Jakt och fiskesamerna, oaivvilda ahte son ii álggos ipmirdan cealkaga.

– Mon in jurddašan nu ollu ovdal go soamis cuigii ahte diet oaivvilduvvo goddit olbmo sákkiin. Dalle mon válden eret iežan bealggi mii vuoseha ahte liikojin kommentára.

Muhto dalle go vuos lohket dan... maid don doivot ahte son oaivvildii?

– In mon dál nu ollu jurddašan, muhto soamis hal riŋgii muinne ja muitalii ahte diet mearkkaša sorbmet soapmása ja dalle mon gal sihhkon eret dan dakkaviđe. Diet cealkka lea dohkketmeahttun jus dainna oaivviduvvo sorbmet soapmasa.

Dás eai šatta makkarge váikkuhusat Ulf Nårsai, čilge Jonsson, guhte oaivvilda ahte lea doarvái go kommentára váldojuvvo eret.

Utsi gáibida ándagassii átnuma

Lars Miguel Utsi lea hirbmadit reageren cealkkagii ja eareliiggánit go sámedikki njunus maid liikoikommentárii. Son gáibida ándagassii átnuma.

– Mon vuorddán ahte juoga daddjo dás, čielga čalmmusteami Håkan Jonssonis ja almmolaččat bivdá ándagassii, dadjá son.

Son joatká: Mon dohkkehan politihkalaš digaštallama ja ságastallama, muhto go uhkidit ja ávžžuhit veahkaváldima, nugo dás lea sáhka ahte goddit mu, de gal fertejit buot oasseváldit cuiget dán, dadjá Lars Miguel Utsi.