Diibmá Ruoŧa ovddit ráđđehus dohkkehii ahte fitnodat Jokkmokk Iron beassá álggahit ruvkki Gállokis Johkamohkis.
Mearrádus lea váidaluvvon sihke Jåhkågasska ja Sirge čearuin ja maiddai luonddugáhttensearvvis, ja disdaga álggahedje šiehtadallamat Alimus hálddahusduopmostuolus Stockhoalmmas.
Okta gii lei sajis vihtáme makkár váikkuhusat ođđa ruvki livčče dagahan, lei nu movt ieš gohčoda fuolas, suhtus ja váivašuvvan Rickard Länta, boazosápmelaš Jåhkågaska čearus.
– Dovdo aŋkke ahte sii guldalit, muhto dát lea ođđa vásáhus man haga gal livččen birgen, son dadjá SVT Sápmái muhto son sávvá buori bohtosiid dáinna.
– Jus sii galget badjelgeahččat visot dán, de in dieđe gosa máilbmi lea joavdamen, son dadjá.
”Mannan nu movt galga”
Jåhkågasska tjieldda juridalas ovddasteaddji Camilla Wikland lei duhtavaš vuosttas beaivvin duopmostuolus.
– Dovdo bures, lea mannan nu movt galga,mii leat hupman olu juridalaš áššiid birra gos mii oaivvildit politihkka ja mearrideaddjit čužžot beare lahka ruvkedoaimma. Mii leat ožžon rievtti fuomášumi buori ládje, dadjá Wikland.
Gaskavahku jotket duopmostuološiehtadusat.
– Mis lea vel okta dehálaš ášši. Ráđđehus lea ovttaoaivilis boazosápmelaččaiguin ahte dáppe ii boađe sáhttit joatkkit boazodoaluin muhto de lasihit moadde eavttuid mii sáhttá šaddat čoavddus ja dan mii galgat loktet, dadjá Wikland.
Duopmu boahtá almmostuvvot ovtta dahje guovtti vahku geažes.