Golbma sámi musea ja gávcci duojára Ruoŧas, Norggas ja Suomas leat iskkame ja dulkome Duiska stáhtalaš musea MEK:e stuorra sámi čoakkáldaga.

Okta duojáriin Ruoŧa bealde eret lea Helena Partapuoli. Son lea válljen dulkot dievdolbmo gávtti Dálmmá guovllus.

– Boahtit museai ja beassat guoskkahit boares dávviriid, jorgguhit daid ja iskkat juohke áidna sávnnji lea leamaš hui somá, dadjá son.

Badjel duhát dávvira čoakkaldagas

Leat badjel duhát dávvirat ja govat MEK:e sámi čoakkaldagas. Daid leat čohkken 1800-logu loahpas gitta 1900-logu álgogeahčái.

Ájtte, ruoŧa duottar-ja sámemusea, lea mielde veahkkin iskkame čoakkáldaga ovttas Suoma Siida sámemuseain ja Norgga Sámemuseaservviin.

– Ulbmil lea ahte MEK galgá oahppat eanet sin sámi čoakkaldaga birra, dadjá Elina Kuhmunen, prošeaktamielbargi Ájtte museas.

Ellen Berit Dalbakk lea okta sis gii ovttasta norggabeal Sámi dán prošeavttas. Son muitala ahte sii leat leamaš Berlines guktii dulkondihtte čoakkáldaga ja sii dovdet iežaset bures vuosttáiváldon museas, dadjá Dalbakk.

– Dat čájeha ahte sii luohtidit min, ja nu dat galgá ge leahkit. Dat lea min guovllu ja min olbmuid duojit maid sii lea váldán museai, dadjá son.

Bargobádji Berlines geassemánus

Prošeakta lea leamaš jođus beannot jagi ja loahpahuvvo Juovlamánus dán jagi. MEK lea ohcan eanet ruđa vai beasale joatkit jagi vel.

Geassemánus galget museat ja duojárat deaivvadit Berlines ja doallat oktasaš bargobáji.

– Dan maŋŋá galgat ságastit boahtteáiggi birra ja got mii sáhttit geavahit dán bargovuogi iežá museaiguin boahtteáiggis, dadjá Sunna Kuoljok, Ájttes.

Pláná lea maid doallat čájáhusa Berlinas, johttičájáhusa ja publikašuvnna. Dasa lassin iskket vejolašvuođa máhcahit ruoktot dávviriid mat leat mielde johttičájáhusas.