115 jagi áigi, namalassii jagi 1908 , LKAB ja Girona nana olmmái Hjalmar Lundbohm navdui váldán mielde sieiddi sámi bassi báikkis. Dál Dálmma čearru háliida oaččut dan ruovttoluotta go geavahuvvui oaffarbáikin jahkásaš johtimiin.

Lea vuorkkas Hjalmar Lundbohmvistis

Ovttasteaddji čearus čálii moadde vahku áigi reivve ráđđehussii ja LKAB:ii, gos gáibidedje sieiddi máhccat ruovttoluotta, dieđiha ođasfitnodat Siren, juoga masa LKAB lea positiivvalaš.

– Sieidi lea vuorkkás HjalmarLundbohmsvistis maid LKAB válddii badjel Girona gielddas 2015. Mii rájaimet eret visot 2016 ja vistti lea divvojuvvon máŋga jagi, easka diibmá rabaimet vuorkká ja mearrideimmet ahte eat bija sieiddi čájálmassii. Dan sajis mii álggaheimmet guorahallamiid muhto eat geargan válbmet    proseassa ovdal go Dálmma čearru válddii oktavuođa minguin, min mielas lei dat positiivvalaš, dadjá Anders Lindberg LKAB preassahoavda.

Hjalmar Lundbohmvistis meidnejit ráhkadit muittu dan ovdii.

– Jurddašit ahte sáhttit čájehit gova ja galbba gos muitalit sieiddi historjjá birra, movt bođii LKAB:ii ja makkár mearkkašupmi das lea, ja makkár oaidnu sámi kultuvrras lei dan áiggi.

Goas lea sáhka addit dan ruovttoluotta?

– Lea váttis čielggadit dan juste dál, mii leat šiehtadallamen čearuin goas ja movt heivešii addit dan ruovttoluotta dadjá Lindberg.