Beassášruohta dollojuvvo dán jagaš Sámi Grand Prix. Lea vuosttas jahkki go lea njuolggosátta ruoŧas, SVT24:is.
Norggas dat oidno buoremus sáddenáiggis riika stuorimus TV-kanálas, NRK:as.
Norggas leat maiddai artisttat dego Mari Boine, Isák ja Keiino guhka geasuhan olu gehččiid eanetloguálbmogis. Ruoŧas eai leat nu galle sámi artisttat geat leat dovddusin olggobealde Sámi.
Dasa reagere Dear Sara, gii lea áigeguovdil maŋŋel go lei mielde ruoŧa Melodifestivalenis dán jagi.
– Mon sávan ahte háliidit eanet vuoruhit sámi musihkkii Ruoŧas, ja ahte go sáddejit Sámi Grand Prix SVT:as ii leat dušše treanda ja dustet bidjat eanet návccaid sámi musihkkii ja artisttaide, son dadja Sámi Grand Prix ovdaságas.
”Ferte lohkat leavssu buorebut”
Tina Mehrafzoon, musihkkajournalista, gean maŋemustá oinniime jođiheame Melodifestivalena maŋŋeságaid dovddasta ahte goziheapmi Ruoŧas sáhttá šaddat buorebut.
– Min fertet lohkat leavssu buorebut. Mon lean vuosttaš dovddastit ahte dát lea scena man in čuovo nu dárkilit. Lea dieđusge juoga maid galggašin gozihit dávjjibut, son dadja.
– Norggas mis leat artisttat geat leat dahkan ahte earát oidnojit. Ruoŧas leat maid olu čeahpes sámi artisttat, dáppe leat seamma vejolašvuođat muhto ferte leahkit strategiija ja čalmmustahttit sámi musihkka, dadja Ole Máhtte Gaup, gii galgá jođihit Sámi Grand Prix.
Golmma prográmmas, mas Natalie Carrion lea jođihheaddji,leat guldalan daid lávlluid ja luđiid. Carrion galgá maid jođihit Sámi Grand Prix.
Vuosttas prográmmas sii hupmet sámi musihkas ja makkár sadjadat das lea Ruoŧa servvodagas.