Girjji čálli Leanne Hinton čállán lingvistihka professor emerita Berkeley universitehtas Kalifornias. Son lea máŋgalogi jagi bargan máilmmi gielaid seailluheami ja ovddidan ovdii. Álgogirji almmuhuvvui 2013 ja Sámi giellaguovddáš lea suinna ovttasbargan 2015 rájes. Son lea logaldallan ja bargobájiid doallan Ubmis.

Go girjái lasihuvvo oassi sámegiela birra ja jorgaluvvo vel ruoŧagillii illudahttá Sámi giellaguovddáža.   

– Girji lea dehálaš dan dáfus go oaidná ahte eat leat okto máhcaheamen giela, dat dáhpáhuvvá miehtá máilmmi, dadjá Sámi giellaguovddáža Sylvia Sparrock.   

”Mávssolaš”  

”Bringing our languages home – sámegillii/ruoŧagillii ” sistisdoallá oktanuppelohkái biográfalaš giellaealáskahttinmuitalusa, Skottlánddas gealagielas, mohawka-, māori- ja sámegillii. Leanne Hinton lea mánusa čohkken ja Olle Kejonen, suoma-ugrála doavttergrádastudeanta lea čállán sámegielaid dili birra Ruoŧas.   

– Lea illu go girji lea jorgaluvvon sáme- ja ruoŧagillii. Lea dehálaš čájehit ja fuomášahttit mo bearrašat miehtá máilmmi ealáskahttet gielaideaset ja oahpahit daid iežaset mánáide, čállá Leanne Hinton preassadieđáhusas.   

”Dat lea doarvái dál”  

Sophia Rehnfjell čállá girjjis iežas giellamátkkis, go oahppagođii ubmisámegiela. Go eadnin šattai 18 jagi áigi, de mearridii ahte háliida oahppat ubmisámegiela ja iežas mánáide dan oahpahit.   

– Giela oahpahallan lea bargu, ja muhtimin garra bargu. Muhto dat ferte beare dahkkot. Jos eat hála sámegiela, de mii joatkit Ruoŧa assimilerenpolitihka. Dat lea doarvái dál, dál mii fertet sámegiela ieža hállagoahtit, dadjá Sophia Rehnfjell.