Gaskavahku, nu leamaš guhkká árbevierru Sámi oahpahusguovddážis, de lea Oahppij vuosádus dahje čájáhus.   

Sámiid Oahpahusguovddáš nuppi jagi oahppit čájehit iežaset dujiid ja nu go dábálaččat, de álgá ráidu skuvlašiljus ja moalkás boardaga bajás čájáhus latnjii. Dán jagáš čájáhusa leat gohčodan “Manname”  

Oahppit leat duhtavaččat ja ilus go čájáhus leat gárvánan ja go olbmot liikojit dasa.   

– Lea hui buorre dovdu go olbmot háliidit oaidnit min dujiid. Mii leat duodjelanjas čohkkán ja duddjon ja doivon ahte šaddá buorre. Doaivumis olbmot liikojit dasa, čaibmá Áile Inga Grape.  

Nuppi luohká oahppit galget sierra barggus duddjot juoga, ja dasa lassin čilget duoji barggu. Áile Iŋgá diđii maid áiggui duddjot.   

– Mun dihten maid áigun ráhkadit, mun lean čađahan sierrabarggu, mii mearkkaša munnje hui ollu, namalassii Ivgu mállet lábbádorkka.   

Okta galledeaddji lei Eva Aira, gii lei diibmá jahkebeale sin oahpaheaddji.   

– Mun šattan hui rámis go oainnán sin dujiid, mun ledjen diibmá sin oahpaheaddji ja sii leat ovdánan viehka ollu dan rájes, muhto sis leage hui čeahpes oahpaheaddjit, namalassii Lise Tapio Pittja ja Miriam Länta, muitala Eva Aira.  

Mo son oahppit sáhttet guovtti jagis nie čeahpit?  

– Na go besset ráfis duddjot, geardduhit ja geardduhit ja oahpahallat, čilge Eva Aira.  

Lisa Drugge lea maid duhtavaš ja ilus.  

– Lea hui suohtas go ná ollu olbmot háliidit geahččat min bargguid. Dat leamaš hui garra bargu, muhto lea maiddái hui somá bargat ovttas iežas ustibiiguin .