Njukčamánu 5 beaivvi gáibidedje Gabna ja Laevas čearru girdingildosa Ábiskovve ja Giebmegáissi guovlluin gaskal Miessemánu 1-14 beaivvi.

Dat lei suddjen dihte bohccuid vai álddut galget beassat njoallut misiid ráfin. Maŋemus giđaid lea leamašan girdingielddus muhto dán jagi Johtolatdoaimmahat ii mieđihan dasa.

– Dat lea eahpegovttolaš ahte Johtolatdoaimmahat vuoruha rikkes čierasteaddjiid geat girddašit helikopterin guottetáiggi, dadjá Karin K Niia, Gapná čearu stivramielláhttu, preassadieđáhusas ja Fredrik Andersson Huuva, Laevas čearu nubbin ságadoalli lea ovttamielat.

– Lea namuhan veara ahte váldá čieža vahku mearridit ahte eai gieldde girdima. Dat mearkkaša ahte mis ii leat vejolašvuohta váikkuhit mearrádusa go dan dieđihit juste ovdal go gielddusáigodat álgá, dadjá son.

Leat váidalan mearrádusa

Heliskiing lea lassánan ja dagahan digaštallamiid maŋemus jagiid ja dat lea váivi čearuide.

Okta sivva manin Johtolatdoaimmahat ii gieldde girdima lea go sii atnet ahte čearut eai leat sáhttán duođaštit konkrehtalaš váikkuhusaid bohccuide.

Čearut leat váidalan Johtolatdoaimmaha mearrádusa.

– Heliski ii gullo Ruoŧa duoddariidda. Mii joatkit dáistalit ja háliidit ahte eanet olbmot bidjet vuostá vai mis lea ráfálaš giđđa boahtte jagi, dadjá Karin k Niia, stivramielláhttu Gapná čearus.