Jonna Blind vuittii guokte golli 57-kilosaččaid joavkkus, sihke gurut- ja olgeš gieđain. Dat lei bajit deaddojoavkkus go láve gilvalit.   

– Mus leamaš gurut giehta vaháguvvon. Lea buorre dovdu go vuiten rátkkagilvvuid ja maiddái loahppagilvvu, muitala Blind.  

Maiddái 14-jahkásaš Elvira Ajnnak vuittii guokte golli +63 kiloluohkás. Son lea duhtavaš vaikko leigga dušše guovttis gilvaleamen dán luohkás.   

– Lei hui somá, muhto háliidivččen eanet gilvaleaddjiid, dadjá Elvira Ajnnak.  

Vuoitán ollu medáljaid   

Jonna Blind lea 2012 rájes bajimus dásis gilvalan giehtafággádallamiin ja sus leat ollu vuoittut, earret eará RM-golli ja medáljat sihke EM- ja MM-gilvvuin.   

Elvira Ajnnak lei eiddo álgán gilvalit, muhto lea juo moadde gilvvu vuoitán. Muhto son váillaha eanet nieiddaid gilvvus ja ávžžuhage eanet nieiddaid searvat dasa.

– Dát lea buorre valáštallan, buohkat sáhttet searvat, lohká Ajnnak.  

Plána boahtteáigái 

Sihke Jonna Blind ja Elvira Ajnnak liikoba dán valáštallamii ja háliideaba buoret šaddat. Maŋŋá RM-gilvvuid soaitá Jonna Blind searvat EM-gilvvuide Suomas.   

– Na leš oaidnit maid dagan, lohká son.   

Elvira Ajnnak gal lea easkka viimmáskan go leamaš  RM-gilvvuin ja háliida šaddat ain čeahpit.  

– Mun háliidan joatkit dáinna. Dál áiggun bures hárjehallat ja áiggun máilmmi meašttirin šaddat, lohká Elvira Ajnnak.