Sámi Duodji čilgehusastis čállá ahte “Lena Viltok lea čeahpes duojár, su duojis lea alla dássi ja son lea badjel 20 jagi jođihan iežas duodjefitnodaga”  

– Mun lean hui ilus ja giitevaš, lohká Lena Viltok ja joatká:  

– Dat mearkkaša hui ollu munnje. Mun duddjon eanaš okta ja go mu barggu atnet árvvus, de addá fámuid ja inspirašuvnna.   

”Son ánssáša”  

– Son gal duođai ánssáša Asa Kitok stipeandda. Sus lea árbevirolaš duodji vuođđun ja dan de ođasmahttá ja duddjo ođđa áiggi dujiid, dát seaguhus lea hui dehálaš ja čáppa, dadjá Sámi Duoji sátnejođiheaddji Linda Wågström Sevä.   

Lena Viltok duddjo náhkiiguin ja tekstiillaiguin, sus leat náhkkeduojit, nugo gálssohat ja gállohat. Son lei dat vuosttas Ruoŧa sápmelaš gii oaččui Svenska Hantverksrådets meaštirreivve duojis jagi 2016.   

Sierra čájáhus boahtte jagi  

Sáme Duodji lea juohkán Asa Kitok muitostipeandda jagi 2005 rájes. Stipeanda 75 000 ruvnnu. Earret gudni ja ruhta, de beassá Lena Viltok doallat sierra čájáhusa boahtte jagáš márkaniin.