Ruoššaluossa Deanus: Eai leat vuos gávdnan čovdosa
Dušše vihtta mánu geahčen sáhttet bealle miljovnna ruoššaluosa boahtit Detnui. Ii leat vuos čielggas movt dan sáhttá bissehit – dat vuorjá báikkálaš guolásteddjiid. Čállá NRK Sápmi
Áššedovdijoavku, maid Birasdirektoráhtta lea bidjan áššái, oaivvildit ahte lea vejolaš bissehit ruoššaluosa vuolimusas daid stuorra luossajogain Finnmárkkus.
Muhto, dat praktihkalaš čovdosat eai leat vel geahččaluvvon, eai ge ráhkaduvvon. Ja geassái han juo bohtet ruoššaluosat Finnmárkui fas.
– Dát ii leat buorre. Mii livččiimet galgan ollen ollu, ollu guhkkelii, lohka Deanočázádaga guolástanhálddašeami direktevra Benn Larsen.
Larsen vuorjašuvvá dainna movt boahttevaš áigodat boahtá šaddat čázádagas.
– Guovtti jagi áigi registrerejedje birrasiid 50.000 ruoššaluosa. Jus mii rehkenastit ahte bohtet logi geardde eambbo dán jagi, de sáhttit vuordit bealle miljovnna ruoššaluosa deike geassái, lohka Larsen.
Go rehkenaste nu, de šaddá čielga hástalussan:
– Dat mearkkaša 11.000 ruoššaluosa juohke jándora guhtta vahku badjel. Ii leat makkárge buođđu mii sáhttá bissehit dan. Dábálaš luosaide šaddá dát stuorra hástalussan.