Vahku áigi bođii diehtu ahte Ruonáeana bisseha iežas oasálasttima gaskkaboddosaččat Davviriikalaš ráđis.

Sivvan dasa lea ahte Ruonáeana ii ane ahte sii besset oasálasttit digášatallamiin mat guskket dehálemoš jearaldagaide ráđis. Rabas reivves moitii Ruonáeatnama ráđđehushoavda Mute Bourup Egede dan hui garrasit.

”In sáhte joatkit leahkit mielde doaluin gos olgguštit oasálasttiid”, čálii son.

Maid Inuuteq Holm Olsen, Ruonáeatnama ovddastushoavda EO:as, lea kritihkalaš.

– Mii eat ipmir manin min olgguštit čoahkkimis mii lea hui dehálaš maid Ruonáeatnamii. Dieđusge mii atnit ahte jearaldagat mat váikkuhit min leat duođalaččat. Maid jearaldagaid main mis ii leat ollislaš mearridanváldi, dadjá son SVT Sápmái.

Son sávvá ahte gávdnet čovdosiid dán áššái.

– Sávvamis álggahuvvojit digáštallamat ja čoahkkimat dán ášši birra gaskkal riikkaid ja ministtariid. Ovdal soittii leahkit árbevierru ahte riikkat main lea iešmearrideapmi eai beassan oasálasttit čoahkkimiin mat gieđahallet sihkkarvuođa ja suodjalusa. Muhto dal lea ođđa áigi ja mis leat maid hástálusat ja áitagat. Danin hálidit oassalasttit digáštallamiin, dadjá Holm Olsen.