Ann-Helén Laestadiusa bálkkašuvvon girji Stöld – Suoládeapmi govvida nuorra nieidda Elsa. Muitalusa vuođđu lea eallin boazodoalus, duohtavuohta davvin ja riiddut gaskal čearuid ja eará gililaččaid.
Elin Oskal neaktá váldorollas ja sus lea sullasaš duogáš dego karaktearas – goappašagain lea gullevašvuohta boazodoallui. Dát guoská measta buot neavttáriid filmmas ja maid bagadalli Elle-Márjá Eirai ja earáid buvttadeamis. Eira lohká ahte sii leat dihtomielalaččat válljen neavttáriid geain lea hárjáneapmi ja ipmárdus muitalussii.
-Mon lean bajásšaddan boazodoalus ja lean ieš boazoeaiggát, nu ahte dát muitalus lea hui lahka mu ja mu váimmu, dadjá Elle-Márjá Eira.
Lunddolaš sámástit
Váldoneavttára Elin Kristina Oskala, Sáltoduoddaris, Nordlanddas, mielas sus leat ovdamunit go sáhttá ávkkástallat iežas máhtu ja hárjáneami. Dát álkidahttá barggu ja seastá áiggi – ja dasa lassin beassá eatnigielas hupmat, sámegiela.
-Go olbmot leat barggus lea visot lunddolaš ja oadjebaš – dat lea hui dehálaš, son lohká.
Dehálaš ahte sápmelaččat ieža muitalit
Ovdalaččas leat olggobeal olbmot muitalan, dulkon ja govvidan muitalusaid sámiid birra. Filbmabuvttadeami bealis dát lea leamaš dihtomielalaš válljejupmi vai dán geardde eai galgga gártat seammá dillái.
-Dát lea hui dehálaš ahte sápmelaččat ieža ožžot muitalit. Galgá leat lunddolaš midjiide sápmelažžan. Mii fertejit ieža čájehit min máilmmi ja got dat lea – ja áidna vuohki dan dahkat lea ahte sápmelaččat ieža dahket dan, lohká Elin Kristina Oskal.
Filbma báddejuvvo dál Važasis, Girona gielddas. Filmmas galgá leat vuosttaščájálmas 2024.
