Ođđaseamos Novus-iskkadeapmi, mii lea dahkkon Sámerádioi ja SVT Sápmái, vuoseha ahte sullii seamma ollu olbmuin lea oalle dahje hui stuora luohttámuš Sámediggái go ovdal lea leamaš, 26 proseanttas 2021:s ja 23 proseanttas dál.
Seammás leat máŋggas massán luohttámuša Sámediggái go buohtastahttá 2021:s. 2021 rájes lea lohku geain lea oalle dahje hui unnán luohttámuš lassánan 25 proseanttas 31 prosentii.
”Suran vehá”
Maŋemus njeallje jagi leat Sámedikkis leamaš siskkáldas riiddut, garra digaštallamat ja sii leat ožžon olgguldas moaitámušaid earret iežá Stáhtakantuvrras. 72-jahkásaš Torkel Fahlgrenas lea stuora luohttámuš Sámediggái, muhto son doaivu dat sáhtálii leat vel stuorit.
– Jus sii heaittále diggot gaskaneaset ja barggale áššiiguin maiguin livččii dehálaš bargat, muitala son.
18-jahkásaš Esajas Persson Fjällman galgá vuosttaš geardde jienastit ja son oaivvilda ahte lea dehálaš jienastit, muhto sus lea unnán luohttámuš Sámediggái.
– Juste dál mus ii leat luohttámuš ja suran vehá, dadjá son ja joatká:
– Mun háliidan váikkuhit rievdadeapmái daningo lea sáhka min boahtteáiggis. Boazodoallu, giella ja dearvvašvuohta leat mu váibmoáššit, muitala son.
Ii galgga váldit bohtosiid nu duohtan
Stáhtadiehtti Ragnhild Nilsson deattuha ahte luohttámušbalánsa rievdá áiggi mielde ja unnida loguid.
– Makkár eanetlohku stivre Sámedikki váikkuha ollu olbmuid luohttámuššii Sámediggái. Opposišuvdnabellodaga jienasteaddjit celket iežaset luohttámuša unnibun ja danin mun jáhkán iskkadeamis dákkár bohtosa, čilge son.