Johan Lundgren, ságadoalli Lulit Kikkejávrri čearus, geahčada sámedikki áššebáhpiriid. Son lea lohkan stivrra evttohusa ođđa čearuorganiserema birra vuđđolaččat. Son dovdá dorvvuhisvuođa go lohká oasi mii lea miellahttuvuođa hábmema birra. Su mielas miellahtuvuohta ii atte dušše vuoigatvuođaid, gávdnojit maid geatnegasvuođat.
-Boazosámit leat unnitlogus juohke sajis earet go čearus, doppe mii mearridit ja bearráigeahččat ahte boazodoallu doaibmá bures. Mis lea ovddasvástádus boazodoallui guovllus eará berošteaddjiid ja eiseváldiid vuostá. Dat sáhttá hádjosit ja olbmot álget geahččat eará beroštumiid, iežas beroštumiid, ja eai šat geahča ollislaččat, lohká Johan Lundgren.
Buohkain lea boazodoalloriekti
Sámedikki stivrra vuolggasadji lea ahte visot sámiin lea boazodoalloriekti. Sii evttohit ahte miellahtuvuohta juhkkojuvvo guovtti oassái, boazoeaiggádat ja eará miellahttut. Jan Rannerud lea ságadoalli Sámedikki boazodoalolávdegottis ja stivralahttu. Son lea dihtomielalaš ahte evttohus dagaha digaštallama.
-Mu višuvdna lea ahte dát unnida riidduid, siskkáldas riidduid sámiid gaskkas, ahte sámit leat seammá vuođu nalde geažos áiggi. Mii dárbbašit visot návccaid ja mađi eanet mii leat čearus geat oaidnit duohtavuođa boazodoaluin ja servodaga váikkuhusain, dađi buoret lea, lohká son.
Seammás son deattuha, ahte su oainnu jelgii lea maid stivrra evttohus, ahte leat čearut ieža geat mearridit gii beassá miellahttun.
Unnit go bealli čearuin vástidan
Ráđđehusa direktiiva mielde galgá eanetlohku čearuin doarjut evttohusa. Sámedikki hálddahus lea vássan jagi čohkken čearuid oainnuid ja hálddahusa evttohus lea leamašan gulaskuddamis. 51 čearus leat 22 vástidan.
Oallugat čállet ahte gulaskuddanáigi lei ilá oatni ja earát ges ahte čearru ii sáhte vástidit go eai oainne maid Sámedikki stivra ja dievasčoahkkin oaivvilda evttohusa birra.
