Jos heahti šaddá dahje soahti buollá Ruoŧas de lea Vualtjere gielda dahkan šiehtadusa Vilhelmina Norra ja Vilhelmina Södra čearuiguin.

Dat mearkkaša ahte gielda sáhttá várret 3000 gilo bohccobierggu sihkkarastin dihte ahte gávdno biebmu gieldda doaimmaide, nu movt skuvllaide ja dikšumii.

-Dat lokte min heahttegearggusvuođa go biebmu gávdno nu lahka. Lea ovdamunni go min gievkanat máhttet láitit dan ja sáhttá olu dahkat dáinna bierggun, dadjá Karl-Johan Ottosson, gielddahoavda.

”Lokte boazoealáhusa statusa”

Čearut leat positiivalaččat soahpamuššii.

-Dat lea diehttelas go jurddaša dan birra, min leat ságastan dan birra ovdal. Go Karl-Johan evttohii dán de orui oba muttát mu beljiide, dadjá Jonas Stinnerbom, Vilhelmina Norra čearu ságadoalli.

Vilhelmina Södra čearu ságadoalli Mathias Blind, dadjá ahte dát sáhttá loktet boazoealáhusa statusa.

-Dákkár soahpamuš lokte boazoealáhusa statusa virgin ja bohcco dego biebmun. Lea buorre ahte gáibidit boazoealáhusa ja ahte min sáhttit veahkehit jos šaddá heahti. Dáinna lágin soitet olbmot oaidnit min nu movt leat – buvttadeadjit, ja eat ge dušše juoga mii hehtteha sisabáhkkemiid, biillaid ja skohteriid, son dadjá.