– Dat lea hui buorre! Dávvirat mearkkašit hui ollu midjiide, dáppe lea máhttu dávviriid birra ja leat rivttes oktavuođas ja biddjojit vuorkái dáppe. Mii áigut čohkket dieđuid daid birra ja áigut joatkit dáinna ovttasbargguin. Mii eat loahpat dan dása, muhto áigut ovttas čohkket máhtu dáid dávviriid birra ja eará dávviriid birra, dadjá stáhta museaid bajimus hoavda ja eiseváldi hoavda Ann Follin.   

Leamaš Ájttes 35 jagi.   

Sámi dávvirat mat dál máhcahuvvojit Ájtte museai, leamaš Ájtte hálddus dan rájes go dat rahppui 35 jagi áigi. Muhto Etnográfalaš musea lea oamastan daid. Go Ájtte rahppui de gulaskudde guhkit áigái luoikat daid, muhto dál oamasta Ájtte daid.   

Etnográfalaš musea lea dađistaga ožžon dáid dávviriid, soapmásat leat 1800-logus, eanaš oassi 1900 – logus ja maiddái 1930 – logus.   

Ájtte sámemusea áŋggirdeaddji  

95 jahkásaš Apmut Ivar Kuoljok lea okta dain gii lea bargan Ájtte musea ásaheami ovdii ja son lea duhtavaš dál.   

– Mun lean garrasit bargan vái sámemusea ásahuvvo deike Johkamohkkái. Álggus lei dat duottarmusea ja mun bargen sámemusea ovdii ja duottarmusea bokte ásaheimmet sámemusea. Dat lea buorre go musea lea ožžon dáid dávviriid ja mun lean oaidnán daid, dat lea buorre go dat lea dáppe ja beassá oaidnit daid dološ dávviriid, lohká Apmut Ivar Kuoljok.