MM- skohtergilvvut lágiduvvojedje cuoŋománu 11.–12. beivviid, moadde vahku maŋŋel riidduid Ran čearu ja Rally Swedena gaskka Ubmis.
Doppe dihkkádedje vuodjingeainnu Ran čearu guohtuneatnamiid čađa. Go Semisjaur-Njargas fuobmájedje ahte MM-skohtergilvvut galge mannat johtingeainnu rastá, de balle ahte dat mielddisbuktá váttisvuođaid. Sis ii lean dalle leamaš makkárge oktavuohta lágideaddjiin Drivecenter Arenain.
Doaibmabidjolisttu
Go viimmat ožžo oktavuođa de ráhkadedje doaibmabidjolisttu. Deaŧaleamos leai ahte čearru beassá geavahit johtingeainnu dárbbu jelgii.
– Lágideaddji válddii vuhtii min sávaldaga, dadjá Anders Erling Fjällås.
MM-skohtergilvvut leat dál nohkan ja Anders Erling Fjällås sávvá ahte čearru beassá geassái ságastit lágideaddjiin vai sullasaš dáhpáhusat eai dáhpáhuva.
”Geiget gieđa”
– Dalle go mis leat bohccot dien guovllus de lea buorre jus plánedettiin dieđihit midjiide moadde mánu ovdal go dákkár doaluid lágiduvvojit.
Anders Erling Fjällås dáhkida ahte čearru ii leat searvan plánet mannan vahkkoloahpa gilvvuid.
– Jus čearru ja lágideaddji doallaba oktavuođa, de unnot váttisvuođat. Gulahallan lea A ja O, dadjá son.