Lena Stenberg, Orusjogas eret, lea guhte lea dahkan dáidaga ”Flyttzon”. Dáidda lea ceggejuvvon Girona boares guovddážis, párkkas mii lea gaskkal vuojadanhálla ja Parkskuvlla. Dán báikki lea dáiddár válljen go dat lea guovlu mii galgá láhppot gávpotsirdima geažil.

– Mon háliidin ahte dat galggai čuoččut boares guovddážis go dat lea siskkobealde nu gohčoduvvon ”Flyttzone”. Moatti jagis boahtá dát guovlu láhppot, dadjá dáiddár Lena Stenberg,

Gironis lea olu sámi historjjá

Dáidda lea oassi prošeavttas maid gohčodit ”Händelsernas centrum” dehe dáhpáhus-guovddáš. Prošeakta galgá hábmet dáidagiid mat čájehit eallinbirrasiid, báikkiid ja gokte mii veadjit go juoga rievdá dehe lea rievdame. Giron gávpot lea hui buorre báiki dán prošektii go lea gávpot maid ferte sirdit ruvkki dihte.

– Háliidan muitalit ahte Gironis lea maid olu sámi historjjá, dadjá Stenberg.

Šattai degu njalla

Dáidagis lea Lena Stenberg hábmen unna stoboža mii lea boarástuvvan ja maid ferte sirdit. Son lea gokčan lásiid ja uvssa.

– Dađi mielde šattai eanet degu njala. Sámi historjjá bođii oidnosii.

Muhto dat ii leat dahkkon muoras, muhto ”spännebáttiiguin” maid lean oktii bidjan ja skruvven gitta.

– Spännebáttit girdet juohkelágán ilmmiid. Dat eai billan eai ge njuoska. Ja daiguin lea buorre bargat, dadjá Lena Stenberg.

Dáidda čájehuvvo geassemánu lohppii, dehe vel guhkibu.