Vuovdega lei sámedikkestivrras Sámi riikabellodagain, Guovssonástin ja Samerna 2017-2021 mandáhttaáigodagas.
Maŋŋel válggaid 2021 jáhkii bellodat, Mikaelssone jelgii, ahte ovttasbargu joatkkašuvvo. Muhto vaikko ledje olu čoahkkimat de bellodagat eai soabadan. Loahpas de Vuovdega, Bivdo- ja guolástansámit ja Landspartiet Svenska Samer ásahedje eanetlogu stivrra.
– Gulaime ahte eai háliidan eanetlogu stivrra. Min eat sáhte bágget iežá bellodagaid ovttasbargat, dadjá Stefan Mikaelsson.
Moaitámuš: Unnibut bargu boazodoalu ovdii
Ođđa koališuvdna oaččui moaitamušaid – oassi dain lei Vuovdega iežás jienasteaddjiin.
Bellodat bargá dásseárvosaš servvodaga ovdii ja bidjet stuora fuomášumi biras- ja dálkkádat áššiide. Muhto dat lea maid boazodoalliid bellodat ja boazodoallu lea álo leamašan dehálaš ášši sidjiide. Máŋga jienasteaddjit atne ahte bellodat ii vuoruhan boazodoalu.
Mikaelsson ipmirda ahte moitet. Muhto dan ođđa ovttasbarggu bakte oaččui bellodat eanet vejolašvuođa váikkuhit boazodoallopolitihka, oaivvilda son. Dál sii leat leamašan ságadoalli boazoealáhuslávdegottis, dan eai livčče soaitá leahkit dan ovdalaš ovttasbarggus.
Boazodoallopolitihkas lea son eareliiggánit duhtivaš dainna ahte báikegoddedepartemeanta lea almmuhan ođđa buhtadusvuogi bierdnavahágiid ovddas, bellodat lea ge bargan dan ovddas. Čearut mat sáhttet duođaštit ahte sis lea olu bierdna galget dan ođđa vuogádaga jelgii oažžut lasi buhtadusa.
– Dat lea stuora čuolbma daid čearuide gos lea olu meahcci ja unnán duoddarat, meahccečearuin lea dábálaččat dat čuolbma, dadjá son.
Háliidit rievdadit movt stivrra ásahit
Loahpa loahpas livččii Mikaelsson háliidit ahte stivrra ásaheami vuogádat muvto.
Son háliida málle mas sámedikki stivra válljejuvvo proporšuvnnalaččat. Dat livččii buktit rasttildeaddji stivrraid gos juohke bellodagas ožžo báikkiid válgabohtosiid jelgii.
– Iežan máilmmis de in digaštala iežá bellodagain muhto ráđđehusain ja riikkabeivviin. Ruoŧa árvvut ja Ruoŧa láhkaásaheapmi váikkuha sámi kultuvrra ja mu buresveadjima, dieđusge háliida váikkuhit daid. Šattalii eanet luohttámuš jos lea proporšuvnnalaččat ásahuvvon stivra, dadjá son.