Sámediggeválggat leat miessemánu 18. beaivvi. Novusa maŋemus iskkadeapmi, maid sii leat dahkan Sámerádioi ja SVT Sápmái, čájeha ahte jus dál livčče válggat de guđas logis jienastivčče soames bellodaga stivraovttastusas, Jakt- och fiskesamerna, Vuovdega dahje Landspartiet Svenska Samer. Ovddit válggaid ožžo sii 53,7 proseantta jienain, dál livčče vel eanet jienat.

– Diehttelas lea dát illudahtti, livččii vearrát jus beare njealjis logis jienastivččii stivrraovttastusa. Dát movttiidahttá olbmo, dadjá Sámedikki stivraságadoalli Håkan Jonsson (JoF).

”Oalle nanu jienasteaddjilohku”

Viidáseappot son čilge manin son jáhkka ahte sii leat nu ovdánan.

-Mis lea dieđusge oalle nanu jienasteaddjilohku, muhto mon jáhkán maid ahte mii leat lihkostuvvan dieđihit jienasteaddjiide min politihka. Dat lea hui dehálaš bealli ja Vuovdegis ja LPSS:s leat maid čielga bellodatprográmmat ja dat mielddisbuktá ahte jienasteaddjiin lea álkibut válljet daid bellodagaid.

Novus-iskkadeapmi čájeha ahte sullii njealjis logis jienastivčče Jakt- och fiskesamerna, mii lea lasahus ovddit válggaid ektui go dalle ožžo 37,6 proseantta jienain.

– Dieđusge mon hirpmástuvan. Mii oaččuimet ollu jienaid maŋemus válggaid ja dál mon illudan ja seammás hirpmástuvan go mis leat vel eanet jienasteaddjit dál. Mon jáhkken ahte gal mii dál juo leat dan rájis maid sámediggibellodat sáhttá olahit, dadjá Jonsson.

”Eai leat dahkan buori barggu”

Sámiid Riikabellodat lea hirpmástuvvan daidda maŋemus loguide.

– Lea imaš daningo mon oaivvildan ahte Jakt- och fiskesamerna eai leat dahkan buori barggu dán mandáhttaáigodaga go eai leat lihkostuvvan máŋggain áššiin. Sii eai leat bálljo searvan riikkaidgaskasaš bargguide ja dat stivra maid Håkan Jonsson láidesta lea dagahan ahte mii eat beasa bargat dujiin ja oahpahusain go ii gávdno makkárge bargogohččun eiseválddis, dadjá Paulus Kuoljok, Sámiid Riikkabellodaga várreságadoalli.