Oscaal , dahje Niels Ovllá Oskal Dunfjell lea máŋgii dearpan rumbbuid lávdde nalde, muhto ii leat juoigan olbmuid ovddas ovdal dál.
Oscaal leai iežas ruovttubáikki, Guovdageainnu, jiellat. Son vuittii luđiin ”Sávrrimus” ja dainna son gudnejahttá buohkaid geat oskklildit dáistalit iežase rivttiid ovddas.
– Dát leai vuorddekeahttá, leai jáhkkemeahttun dušše lávdde nalde čuožžut. In jáhkkán gal ahte vuoittán, dadjá son.
”Duhát giittuid”
Lávlunoasi vuittii hárjánan juoigi Piera Eira ovttas debutánttain Máijáin. Lávlagiin, mii leai sihke luohti ja lávlla, leai goalmmádin maŋŋel go dubmengoddii almmuhii iežas jienaid, muhto ledje gehččiid jienat mat adde sudnuide vuoittu lávlunoasis.
– Duhát, duhát giitosiid, dajai Piera Eira maŋŋel gilvvuid.
Inspirašuvnna son oaččui go dálkin leai duoddaris ja dainna son gudnejahttá buohkaid geat vásihit váttis áiggiid.