Ruoná nuppástusa oktavuođas hupmet hárvenaš eanametállaid birra, mat leat dehálaš ávdnasat mat geavahuvvojit earret eará bieggamilluin ja el-biillain.
Kiinná lea stuorámus oassi dán márkanis ja geavaha maid stuorra oasi daid metállain.
Muhto eaktodáhtolaš organisašuvnna Global Witness fuomášuhttá ahte rabasruvke bilida luonddu, mirkkohuhttá birrasa ja nuoskkida čázádagaid. Danin leat Kiinnálaš fitnodagat roggagoahtán ránnjá riikkas Myanmaras.
Vártnuhis bargodilli
Global Witness lea guhtta mánu guorahallan ruvkebargiid bargodili Myanmaras, mii organisašuvnna vuođul dáhpáhuvvá lobiheamet ja bearráigeahču haga.
Filmmas oainnát oasi Global Witness govaid ja filmmaid, mas luonddu bilideami ja maiddái bargiid vártnuhis bargodili oainnát.
Erohus riikkaid gaskkas
Kiinná ja Myanmara bargodili geavahuvvo ággan manin ruvkedoaimmat galggašit Ruoŧas leat.
Málbmageologiija doseanta, Luleju Teknihkalaš universitehtas Olof Martinsson oaivvilda ahte LKAB roggamat leat áibbas eará dásis.
Hárvenaš eanametállat leat liigebuvttan LKAB ruovdemálbma buvttadeamis. Danin LKAB eanametállaid buvttadeapmi lea eanet gánnáhahtti ja iige geavat eanet eatnamiid.
– Dál mii geavahit bázahusaid, mat eai leat adnon masage, muitala Olof Martinsson.
Fuomáš!: Global Witness lea riikkagaskasaš organisašuvdna, mii ásahuvvui 1993, mii geahččala eastadit luondduriggodagaid boasttogeavaheami, riidduid, geafivuođa, korrupšuvnna ja olmmošvuoigatvuođa rihkkumiid miehtá máilmmi.. Gáldu: Global Witness