Badjel 40 jagi lea okta darfegoahti Golsjönes, gaskkal Sollefteå ja Orrestaare, leamaš čoahkkananbáiki.
Muhto mannan mánnodaga bolde dan boares darfegoađi. Dan sadjái hálidit cegget ođđa oarjánsámi goađi. Mannan vahkkoloahpa leai symbolalaš loahpaheapmi dán goađis mii leai álgán guohpput.
– Mii áigguime geavahit muhtin ávdnasiid dán goađis, muhto go ii oktage lea leamaš doppe dolasteami de leai buot guhppon. Mii fertiime addit dan ruoktot lundui ja danin bolddiime dan, dadjá Birgitta Ricklund, Orrestaare saemien siebres.
Okta geas leat olu muittut dán goađis lea Ulla Kristoffersson Ortuo. Muhto son maid illuda dasa ahte šaddá ođđa goahti.
– Mii han leat doallan čoahkkimiid ja kurssaid dáppe 80- ja 90 logus. Semmas lea buorre ahte bolde dan, go dat leai nu heajos gunttun ja ahte šaddá ođđa goahti lea hui somá.
Dalle sáhttet cegget ođđa
Muhto gosa ja goasse dát ođđa oarjánsámi bealljegoahti šaddá duohtan ii leat vel čielggas.
– Mon galggan ohcat huksenlobi saemien siebre ovttas go sihke SCA ja Sollefteå gielda hálideaba ahte mii sáddet sisa ohcamusa nu ahte sáhttet geahččat gosa dán goađi sáhtálii cegget.
– Mis lea evttohus gosa livččii vuogas cegget dan, muhto ferten ságastit stivrrain nu ahte mii leat ovttaoaivilis. Muhto dát lea guhkes proseassa go mii fertet ohcat huksenávdnasiid mat sohpet. Nu ahte eat sáhte álgit hukset ovdal go 2025, dadjá Birgitta Ricklund.