Ášši fuomášuhttoi “15 minuhta Sámis” prográmmas juovlamánus. Biilaparkerensajis lullelis riikaráji, dovddus turistajávrri lahkosis, maid ruoŧagillii gohčodit Trollsjön, gávdno nai njuolga jorgaluvvon sámegiel namma: “Ruollajávri”.
Namma mii ii leat goassege gávdnon
Nu eai leat goassege gohčodan jávrri. Das lea namma leamašan Geargejávri, mii mearkkaša Stensjön. Maŋimus áiggi lea jávri šaddan Riššajávrin, mii lea maid formálalaš namma Lantmäterieta kárttas.
-Trollsjön lea dušše turistanamma, justá dego “Lapporten”, lohká Girona gielddadirektevra Johan Bergstad.
Maŋŋá go gieldda ja čearuid ovttasbargoorgána Min Ođđa Giron vuosttildii nama, lea Girona ođđa gielddastivra vuhtiiváldán moaitamuša. Gielddadirektevra lea ožžon gohččosa lonuhit galbba.
-Mu mielas lea imaš go leat geavahan sámi nama mii ii leat álgoálgosaš, dan sajis leat njuolga jorgalan Trollsjön, lohká Emilia Töyrä (S), vuosttas várre ságadoalli gielddastivrras.
Gávdne vihtta eará siva
Gielddadirektevra Johan Bergstad muitala ahte ráhkadedje galbba jođánit, go parkerensajit E10-luotta guoras ledje válbmasat.
-Manai johtilit ja šattai boastut ja sivva dasa lei gelbbolasvuođavátni. Min dábálaš jorgaleaddjit eai lean olahanmuttos, ja dalle válde eará jorgaleaddji bargui.
Earet go njuolga jorgalus, gávdne maid vihtta eará siva galbbas, maid dál galget lonuhit. Huksenáigodat Gironis lea oatni, ja dan sivas sáhttá ádjánit gitta boahtte geassái ovdal go bissovaš galba lea sajis, lohká Johan Bergstad.
Dehálaš sihkarvuhtii
Son gávnnaha ahte galba ferte rievdaduvvot maid duottarsihkarvuođa geažil.
-Jus muhtumis ii leat kártá, ja govve galbba ja čujuha sierra báikenamaide – vaikko vel bustávaid geardduhat it olle njuolga báikái, dan dihte go lea vearrut čállojuvvon, dadjá Bergstad.
Got dán sáhttá čoahkkáigeassit ovtta sániin?
– Eahpeheivvolaš.