Dan čállosis maid Martin Jonsson, leanastivrra gieddeossodaga hoavda, lea vuolláičállán dadjo ahte dat mii ain livčči dahkat geatkelohkamis ii boađe cađahuvvot, danin go váilo ruhta maŋŋeliskkadeapmái.

Dat mii ii boađe čađahuvvot lea bievlaiskkadeapmi.

Leanastivra lea juo árabut dán jagi váruhan ahte šadda hástalus čađahit boraspirelohkamiid ruhtavánivuođa geažil.

Stig Allas, Dálmmá čearu boraspireovddavástideaddji, dadjá ahte dát lea duođalaš dilli.

-Maŋŋel bievlaiskkadeami ožžot máŋga čearu duođaštusa ahte lea geatkebiedju go dalle sáhttá gávdnat guolggaid ja iežá duođaštusaid.

Duođaštuvvon geatkebieju vuođul juolluduvvo ruhta čuovvovaš jahkái ja jus de leat unnán duođaštuvvon biejut de unno maid ruhta, dadja Stig Allas.

Sámedikki boazodoalulávdegotti sátnejođiheaddji, Jan Rannerud, oaidná maid váttisvuođaid go máŋŋeliskkadeapmi ii dahkko. 

-Dat vearrámus lea jus leanastivra dulko dán iežasládje de massá čearru  buhtadusa.

Jus leanastivra ii sáhte dahkat bievlaiskkadeami go lea unnán ruhta dasa de iige sáhte biehttalit  geatkebieju, dadjá Jan Rannerud.