Vuosttas gearddi go giellabeasi lágideapmi bođii jurdagii lei bargojoavkku ságastallamis giellaguovddážis.
-Mii ságastalaimet ahte ii šatta sámi rihppaskuvla dán jagi nuoraide geat leat riegadan 2008. Mii diehtit ahte leat ollugat geat livčče hálidan dohko vuolgit. Lágidit konfirmašuvnna ii leat mihkke maid mii giellaguovddažis sáhttit dahkat, muhto giellaleairra- dan mii sáhtiimet ordnet. Nu ahte mii mearrideimmet lágidit dan, dat dovdui dehálaš, muitala Sara Omma Simma, gii lea giellaguovddaža ossodathoavda.
Gulahallan giellarájiid rastá ii lean váttis
Vaikko lei vuosttas geardi go Sámi giellaguovddaš lágida dákkár doalu de válljejedje doallat dan rabas buot nuoraide geat leat riegadan 2008 (maŋŋel maid 2007), beroškeahtta gielladási ja sámi váldogiela.
-Lei min sávaldat ahte nuorat galge oaidnit ahte ii leat váttis gulahallat giellarájiid rastá. Sáhtta aŋkke ipmirdit guhtet guimmiineaset ja ii dárbbaš lonuhit ruoŧagillii, dadjá Sara Omma Simma.
Son joatká:
– Livččii somá jus livčče boahtan nuorat buot vihtta sámi giellaguovlluin, leimmet ráhkkanan dasa. Muhto ovdamearkka dihte ubmi- ja bidumsámi giellaguovllut leat oba unnit nu ahte eai doppe gávdno nu olu nuorat álggu rájes geat leat rievttes agis. Nuorat lea joavku man sáhttá leahkit váttis olahit. Muhto mii leat hui ilolaččat go dát nuorat bohte, mii oaččuimet čoahkkai oba fiinna joavkku.
Gula oassálasti Enok Sunna muitalit maid son anii dán vahku birra.