Buot álggii 1983 go Ruoŧa stáhta áiggui dulvadit Gáláseanu. Seamma áigge ledje sosiálademokráhtat bovden palestiinnalaš jođiheaddji Yassir Arafata Ruŧŧii.
Sámi nuoraidorganisašuvdnii lei dát buorre liiba oažžu su davás.
Adnojuvvui terroristan
Yassar Arafat ja su organisašuvdna PLO juhke dalle oaiviliid. PLO lea máŋga palestiinnalaš searvvi oktasaš organisašuvdna, mii 1960- ja 1970-logus lei seahkanan máŋga terrordahkkui. Palestiinna ášši bođii máilmmi dihtosii veahkaválddálaš daguid bokte ja go válde badjelasas girdiid.
Palestina iehčanasvuođa gižžu sulastahtii sámiid dili Ruoŧas, oaivvildii Sáminuorra. Ja nu bovdejedje Johkamohkkái Arafata, gean máŋgasat máilmmis atne terroristan.
”Palestiinna friijavuođagižžu ja Sámi vuoigatvuođaáŋgiruššan leat sullasaččat”, čálii dalá sátnejođiheaddji Aina Negga bovdehusas.
Sámi organisašuvnnat moite
Mediain álge seammás digaštallat ášši. Sihke Sámeätnam ja Ruoŧa Sámiid Riikasearvi moite Sáminuora. Go vel PLO maid ávžžuhii Sáminuora, ahte eai nu rahpasit bargga, muitala Lars Anders Baer.
Muhto šattai nugo nuorain lei ulbmil, vuige Lars Anders Baer, 40 jagi maŋŋá.
– Dát šattai buolli báhkka ášši, Ruoŧa mediain digaštalle ášši, mii lei min ulbmil, dadjá Lars Anders Baer
Muhto čoahkkin gal ii šaddan. Yassir Arafat ii boahtán Johkamohkkái.
Geahča ”15 minuter från Sápmi” lávvardaga diibmu 16:05 SVT2:s dahje SVT Playas