Lise Tapio Pittja mielas lea dehálaš goarrut dološ dujiid ja nu oahpahit árbevieruid. Dat boahtá ovdan su čájáhusas Sámi Duoji viesus Johkamohkis.

 – Oahpahit lea seamma dehálaš go sákkaldagat, dadjá jagi 2022 Asa Kitok – stipeandavuoiti, Lise Tapio Pittja.

Su eadni lei das go nieidas oaččui stipeandda ja son lei doppe go su nieidda čájáhusa rahpamis

– Ii leat leaikage man čeahppi son lea, lohká Inghilda Tapio, ja čujuha gahpiriidda mat leat čájáhusas. 

Son lea čeavlái go su nieida Lise Tapio Pittja atná nu ollu áiggi oahpahit earáid, earret eará oahpaheaddji barggus. 

– Su jurddašanvuohki lea buorre ja mo son oahpaha nuoraid. 

”Maid mun lean oahppan, áiggun oahpahit earáide”

Čájáhusa lea gohčodan Šiella, mii mearkkaša skeaŋka. Dat lea skeaŋka su ovdavázziide. Ja son jurddaša maid sin birra geat su maŋŋá bohtet. 

– Dat ii guoskka dušše duodjái, muhto sámi kultuvrii oppalohkái. Munnje lea oahpahuvvon dat ja mun oahpahan earáide vai dat joatkašuvvá, muitala  Lise Tapio Pittja

Veahá ovdal go oaččui Asa Kitok – stipeandda, de fuomášii maid háliida dahkan. Čájáhussii lea son geahčadan maŋos ja earret eará lea gorron ládjogahpira čájáhussii. Video

Filmmas muitala Lise Tapio Pittja maid áigu čájáhussii duddjot ja manin. Govva: SVT

”Dehálaš ovdamearkkat”

Inga Elisa Påve Idivuoma lea Sámi Allaskuvlla lektor duojis Guovdageainnus. Su mielas lea dehálaš ahte ohppet dološ árbevirolaš dujiid, ja duodji ii leat dušše atnuávnnas, muhto dat lea oassi dáidagis ja akademiijas. 

– Lise Tapio Pittja ja eará čeahpes duojárat leat dehálaš ovdamearkkat. Go máhttá duddjot, de leat ollu vejolašvuođat, sáhttá museas bargat, fitnodaga jođihit dahje sáhttá akademalaččat joatkit. Mii vásihat odne dáppe ahte ollus beroštit duojis, sihke Sámis ja muđui máilmmis.