Lars Miguel Utsi ja Marita Stinnerbom jođiheaba bellodaga Guovssonásti. Son oaivvilda ahte mandáhttaáigodat lea leamaš hástaleaddji juohkehažžii.
– Mii vásihit ahte Sámedikki politihkalaš bargovuohki ovdána vearru guvlui, čilge son.
Vaikko ii leat duhtavaš stivrra bargguin, de lea duhtavaš maid iežas bellodat lea olahan.
– Mu mielas mii leat lihkostuvvan ovdanbuktit dan maid mii oaivvildit livččii sáhttit buoridit. Min jelgii lea stivra bargan vearrut ja sámi rivttiid vuostá.
Válljejedje ii searvat
Lars Miguel Utsi moaitá garrasit stivrra bargovuogi, muhto seammás lea Guovssonásti válljen ahte eai searvva stivrra fálaldahkii.
Go stivra bovdii visot bellodagaid searvat parlamentáralaš lávdegoddái, gos bellodagat galge ovttasbargat ovddidan dihte ođđa bargovugiid, de válljii álggus olles opposišuvdna ahte eai searvva.
Parlamentáralaš lávdegottis dis livččii vejolašvuohta konkrehtalaččat váikkuhit mearrádusaide, muhto guhká válljiidet ahte ehpet searvva, manin?
– Mun in jáhke mis livččii nu stuora vejolašvuohta váikkuhit. Mii diehtit mot eanetlogubellodagat barget ja mii oinniimet ahte eat oaččo daid vejolašvuođaid ja eavttuid parlamentáralaš lávdegotti bokte.
Nuorat ja boazodoallu
Guovssonásti lea guhká profileren iežas dainna ahte sin bellodat háliida doarjut čearuid. Sii leat dat áidna bellodat mii háliida oažžut eret boazodoalu Sámedikki stivremis.
– Máŋga guorahallama vuosehit ahte sii geat leat boazodoalus eai luohte Sámediggái. Lea unnán luohttevašvuohta Sámediggái ja politihkalaš stivra váikkuha dasa mot boazodoallohálddašeapmi doaibmá.
Háliida guoddalit jienastuslogu
Guovssonásti maiddái háliida ahte Sámedikki jienastuslogu galgá sáhttit guoddalit. Dán háliidit daningo Sámediggi ovdal lea váldán olbmuid geat eai deavdde eavttuid jienastuslohkui. Vuosttaš jagiid leat earret iežá sii geat leat náitalan sámegielagiin beassan jienastuslohkui.
– Jienastuslogus leat namat mat eai gula dohko. Dát sáhttá dáhpáhuvvat boahtteáiggis maid, ja de lea diehttelas ahte galgá sáhttit guoddalit mearrádusa, deattuha Lars Miguel Utsi.
Utsi mielas ii galgga rievdadit vuogi mot ohcá beassat jienastuslohkui, muhto galggalii rievdadit mot gieđahallá dieđuid.
– Ferte leat objektiivvalaš vuohki dárkkistit ahte ohcci dieđut leat riekta, dadjá son.