Maid Sápmi dutnje mearkkaša?

– Sápmi lea min ruoktu, min duovdagat, min eallin. Sápmi lea čáppat, guoibmái ja árvvas. Muhto maiddái muhtomin garas, gáđaš ja váttis. Sámis leat hástalusat, muhto seammás Sápmi nanne min oktavuođaid ja čatná min oktii.

Mii lea buoremus leahkit sápmelaš ? 

-Fuolkevuohta, oktavuohta, lagasvuohta eatnamiidda, giella, min árvvut.

Gii lea du ovdagovva?

– Váttis válljet dušše ovtta. Eadni, buot maid máhttá, lea ovddidan, ovdánahttán ja doaimmahan. Ja vuoni. Sámi nanu nissonolbmot. Ja vel buohkat geat buot roasuid čađa rahčet doalahit min eallinvuogi ealasin.

Jus beasášit niegadit – mii livčče buoremus ođas SVT Sámis goassege? 

– Ahte sámegiella ja min vuođđoealáhusat eai leat šat áitojuvvon.

Maid leat álo hálidan almmolaččat dadjat, muhto it leat dahkan ovdal go dal? 

– Máhcahit boazoealáhusa vuođđojurddašeami, sihke individa ja kollektiva, gaikut rájiid, heaittihit dáčča/látti boazodoalu davvin, johtit nu go dolin. Dát buvttášii hui, hui olu hástalusaid ja váttisvuođaid, muhto jáhkán go daid nagodivčče dustet ja čoavdit ovttasráđiid rabas mielain, de šattašii áiggi vuollái vel nannoset ealáhus.

Dát dieđuš eaktudivčče maid ahte sisabahkkemat ja eananrievideamit heaittihuvvoše.

Loahpas, geasa háledat sáddet dearvahiid? 

– Go dát lea svt siidui ihtime, de háliidan sáddet dearvuođaid buot iežan oahppásiidda ja earenoamážiid fulkkiide ruoŧa bealde Sámis. Sávan mii fargga oaidnalit fas, gos nu, livčče hávski!