Fitnodat Holmen energi hálida cegget bieggamillopárka lahka Granlidena, sulli 25 kilomehtera davvelis Långviksmon, Syöldate (Örnsköldsvik) gielddas.
Plána lea hukset 33 bieggamillo mat leat eanemustá 250 mehtera allagat.
Jus dát huksenplánat šaddet duohtan de váikkkuhivčče dát garrasit Vilhelmina norra čearu dálveláidumiid.
Čearus leat juo dal máŋga bieggamillopárkkat ja sii oaivvildit ahte okta vel párka dagalii stuorra vahágiid.
”Ii oaččo dáhpáhuvvat”
– Mu mielas dát ii oaččo dáhpáhuvvat, dat dagahivččii olu váttisvuođaid min boazodoallui jus dat huksejuvvu, dadjá Neila Fjellström, boazobargi Vilhelmina norra čearus.
-Mii leat juo heivehallan iežaimet nu olu, dal eat šat sáhte dahkat dan, mis eai leat liigeeatnamat gostege.
Guovllus, gos plánejit hukset párka, gávdnojit lahppomeahcit ja jeageletanamat mat leat deahálažžat boazoealáhussii.
-Eai leat dušše bieggamillopárkkat guovllus. Holmen fitnodagas lea stuorra vuovdedoaibma dán guovllus. Nu ahte min eatnamat leat juo guhká eksploaterejuvvon ja mis ii leat vejolašvuohta sirdit gosage. Mii dárbbašit dán guovllu vai sáhttit joátkit boazodoaluin, dadjá Margret Fjellström, boazobargi Vilhelmina norra čearus.
Suodjalusdoimmahat sáhttá bissehit huksema
Dasa lassin geavaha Suodjalusdoimmahat guovllu.
Justte makkár oaivilat sis leat bieggamillopárkii ii leat vel čielggas. Muhto maile bokte vásttidit SVT Västernorrlandii ahte sii oidnet ahte dilli guovllus lea rievdan maŋemus jagiid.
”Deahálemoš rievdadusat leat nuppástuvvon dilli máilmmis ja viiddiduvvon suodjalus”, čállet sii SVT:ii ja jotket:
”Mii árvvoštallat ahte Suodjalusdoimmahaga beroštumit ja doimmat sáhttet váikkohuvvot. Go plánejit bieggamillohuksemiid ferte Suodjalusdoimmahat suokkardallat juohke áidna prošeavtta vai sáhttá leat sihkkar ahte plánejuvvon párka ii galgga heađustit riikaberostumiid ja ollislaš suodjalusa militeara oasiid”.