Heliski lea ain hástalus čearuide. Helikoptergirdimat ráfehuhttet bohccuid guottetáiggi.
Sihke Gapná ja Laevas ohce gaskaboddosaš heliskigildosa miessemánu álgogeažis. Johtolatdoaimmat hilggui ohcamuša.
Gaskaboddosaš mearrádus
Mearrádus váidaluvvui ja hálddašanriekti cealká dál ahte váldet gaskaboddosaš mearrádusa mii mearkkaša ahte gielddusguovlu ásahuvvo miessemánu 1-14 beaivvi.
– Duopmostuollu dadjá ahte lea vuorddehahtti ahte bohccot mannet daidda guovlluide masa ášši guoská dan áigodagas, ja dat lea ágga dohkkehit čearu váidalusa, dadjá Jenny Wik Karlsson, Ruoŧa Sámiid Riikkasearvvi jurista, ovddasta čearu áššis.
Gaskaboddosaš mearrádus mearkkaša ahte duopmostuollu sáhttá váldit mearrádusa jos ášši ii leat vel mearriduvvon. Muhto duopmostuollu árvvoštallá ahte ii leat doarvái vuorddehahtti ahte Gapná čearru vuoitá ášši.
”Go váldá diehtun mii dán rádjai lea bohtan ovdan áššis, birasgáhtten perspektiivvas, de lea vuorddehahtti ahte bohccot leat dan gielddusguovllus dan áigodagas. Hálddašanriekti árvvoštallá ahte lea dan vearddi vuorddehahtti ahte váidalus dohkkehuvvo.”, čállá duopmostuollu.
”Dovdo hui buoragit”
Mearrádus guoská beare Gapná čearu. Lea ain eahpečielggas mii šaddá Laevas čearu váidalusain.
– Dat dovdo hui buoragit ahte duopmostuollu lea váldán vuhtii maid čearru lea ovdanbuktán. Eareliiggánit ahte sii oidnet ahte bohccuid ferte suddjet dán áigodagas. Min doaivva lea ahte hálddašanriekti dahká seamma árvvoštallama Laevas čearu váidalusain, dadjá Jenny Wik Karlsson.