Guovvamánus 2023 manne nuorat Olju- ja enerergiijadepartemeantai Oslos eai ge gárron vuolgit.
Sii čohkkájedje doppe máŋga beaivvi ovdal go boliissat gudde sin olggos.
Prinsihpalaš mearkkašupmi
Dasto álge stuora miellačájeheamit dan vuostá movt Norgga ráđđehus lei meannudan bieggafápmopárka Fovsenis.
Aktivisttat ožžo sáhkuid muhto sii eai gárron máksit daid. Danin sii áššáskuhttojuvvo sihke Norgga digge- ja lágamánnerievttis muhto sii áššehuvvojedje goappás duopmostuoluin.
Muhto áššáskuhtti ii leat vuollanan áššis. Dál lea čielggas ahte ášši meannuduvvo Alimus duopmostuolus geassemánu 19 beaivvi. Doppe meannudit beare áššiid main oaivvildit lea prinsihpalaš mearkkašupmi.
Eanetlohku háliidii dubmet miellačájeheaddjiid
Áššáskuhtti čujuha earret eará dasa ahte eanetlohku duopmáriin lágamánnerievttis háliidedje dubmet áktivisttaid. Njeallje duopmárat háliidedje dubmet ja golmmas eai háliidan. Norgga duopmostuoluin lea gáibádus ahte unnimus guokte goalmmát oasis duopmáriin galget leat ovtta oaivilis jos áššáiduvvan olmmoš galgá dubmejuvvot.
Áššáskuhtti jáhkka ahte dát ášši sáhttá oažžut prinsihpalaš mearkkašumi miellačájehemiide Norggas boahtteáiggis.
– Mii jáhkkit ahte dát ášši sáhtta šaddat mearkkašahtti iežá miellačájehanáššiide go guoská maid boliissat sáhttet dahkat sullasaš diliin, dadjá áššáskuhtti Stian Hermansen NRK Sápmái.
Norgga stáhta ánuhii ándagassii
Go miellačájeheamit álge Oslos de ledje jo 500 beaivvi gollan dan rájes go Norgga stáhtta dubmejuvvui álbmotriekterihkkumis dan geažil movt ledje meannudan bieggafápmopárka Fovsenis. Bieggafápmorusttegat váikkuhedje guovllu boazovázziid garrasit muhto sis ii lean goitge dadjamuš go huksejedje párka.
Maŋŋel máŋga miellačájehemiid 2023:as de ánuhii Norgga stáhta ándagassii. Seammás álggahuvvo gulaskuddamat Fovsena boazovázziiguin ja boađus lei šiehtadus mii sihkkarastá boazodoalu guovllus, boazovázziid jelgii.