Dássážii leat SVT Sámi neahttaságat, tv-ođđasiid lassin, almmuhuvvon Sámeradio siiddus, sr.se vuolde. Gaskavahku almmuhuvvo vuosttaš háve aibbas iežas neahttasiidu.
– Mii eat leat nu máŋggas geat gozihit sámi áššiid nu ahte juohke ođđa lávdi lea dušše illudahtti, lohká Hermansson.
Álbmogii mearkkaša dat Hermanssona mielde eambbo ságaid ja eambbo sámi tv -sisdoalu neahtas.
Álkkit olatmuttos
Ulbmilin lea ahte fállat eambbo ođasságaid sámi álbmogii, muhto maiddái lohket sámi ođđasiid eanetloguálbmogii.
– Dehálaš oassi rievdadusas lea loktet sámegielat sisdoalu buorebut álbmogii olles svt.se-siiddus, dadjá Michael Österlund, prográmmahoavda SVT.
Son joatká:
– Dáinna šaddat olu álkkit SVT riikkaođđasiidda loktet sámi áššiid ja sámi ođđasiid riikkabájilčállagiid searvái, vuosttaš siidui.
”Ealli govat oidnosis”
Ođđa siidu lea okta máŋga ođđa satsningas (?) man SVT lea dahkan vássán jagi. Álgojagis álggahuvvui tv-prográmma ”15 minuter från Sápmi”, mii lokte Ruoŧa beal Sámi ságaid. Prográmma sáddejuvvo fas giđabeallái seammas go doaimmahus joatká beaivválaš neahttaalmmuhanbarggu.
– Leamaš hohpos muhto somás áigi go leat dásá joavdan, dadjá Linda Hermansson, SVT Sámi doaimmahushoavda.
Mii lea stuoramus rievdadus álbmogii?
– Stuoramus rievdadus lea ahte ealli govva oažžu stuorat saji neahttasiiddus. Ođđa siiddus sáhttit álkkibut čájehit iežamet čiekŋudeaddji ságaid heivehuvvon páhkas.
Mo oidnojit iešguđege sámi gielat siiddus?
– Mihtun lea almmuhit artihkkaliid ain jo davvi-, julev- ja lullisámegillii, dasgo min mielas lea dehálaš čalmmustahttit gielaid maiddái čálalaččat. Dál leat iskkamin iešguđegelágan hámiid, main giella oidno. Eat leat gal vel gávdnan standardahámi, muhto ulbmilin lea loktet čálalaš giela.
