Hárjánan gilvaleaddji beasai álkit viidáseappot gilvvus, muhto raggariin Elovas ja Bennys ja Viktor Crones sáhttet semifinála bokte beassat loahppagilvui lávlagiin “Diamonds”.
Dá lea njealját geardde go Jon Henrik Fjällgren beassá dán musihkkagilvui ja Tone Sekeliusii gis nuppi geardde, ja son lea hui ilus
– Mun in vel jáhke ahte lean beassan viidásat. Mun ledje balus ja dovden ahte dát ii leat álki, go sihke boarrásat ja nuorat geahččit, lohká son.
Seamma ilus leat Fjällgren gázzi go vuite oassegilvvu.
– Mun in dieđe mo leažžán lávlunge, álgen measta čierrut go olbmot vuostái válde min, dadjá Woods.
Jon Henrik Fjällgren muitala ahte su guovtte jahkásaš nieida Elle Sáve, geasa lea čállán lávlaga, geahčai gilvvuid Davvi Norggas
– Son lea nu njuoras, Son várra geahččá ganjalčalmmiiguin, árvala son.
Lávlagiid čállit
Tone Sekelius leamaš mielde čállimin lávlaga ”Rhythm Of My Show” ovttas Anderz Wrethovain, Dino Medanhodziciin, Jimmy ”Joker” Thörnfeldtain.
Earret Fjällgren ja Arc north de leat Calle Hellberg, Joy Deb, Oliver Belvelin, Richard Lästh, Tobias Lundgren ja William Segerdahl leat buvttadan ”Where you are (Sávežan)” lávlaga.
Oassegilvu 2
Boahtte oassegilvu dollojuvvui lávvardaga guovvamánu 11 beaivvi Linköpinga Saab Arenas. Dánge gilvvus leat moadde beakkálmasa melodiijafestivála oktavuođas, namalassii Wiktoria, Panetoz ja Theoz.
Wiktoria lea okta dain moatti artisttain, gii lea golmma geardde beassan njuolgga loahppagilvui, 2016, -17 ja –19. Panetoz lea dušše oktii njuolgga beassan loahppagilvui, namalassii 2014, ja guokte jagi maŋŋá beasai loahppagilvui semifinála bokte
Theoz lea oktii oassálastán, jagi 2022 dalle son beasai semifinálii ja dasto finálii. Dat lea vel vuoitu mii váilo dán golbmasis.