Moadde vahku áigi almmuhii rihkkuneastadanráđđi vuosttaš gearddi raporta vašširihkkumiid birra sápmelaččaid vuostá gos olbmot leat muitalan surgadis muittuid ja vásahusaid birra.
Sara Skum lea boazovázzi ja lea ieš vásihan mo su bohccot biidnašuvvet ja gottáhallot. Su mielas lea buorre ahte raporta almmuhuvvo.
– Dat mearkkaša hui ollu midjiide geat leat máŋggaid jagiid geahččalan čalmmustahttit dán. Dat lea dehálaš raporta, mon jáhkan ja sávan ahte dat muhtin muddui addá midjiide njuolga, son dadja dán vahku 15 minuvtta Sámi prográmmas.
Kristina Sehlin Macneil, doseanta sámi oahpahusas Ubmeje universiteahtas, lea lohkan raporta.
– Dat lea balddihahtti ahte leat čállán boasttodieđuid sihke áviissain ja eará medias. Dat dahka vahágiid ja lea mu mielas erenomáš heittot. Dat lasiha nállevealaheami ja ovdagáttuid sápmelaččaid birra.
Hálida oaidnit loktejuvvon ráŋggáštusmeari
Ráđđehus lea ožžon raporta ja Sehlin Macneil oaivvilda ahte deháleamus dál lea movt dáinna mannet viidáseappot.
– Dat gáibida beroštumi politihkkariin ja ahte bidjet návccaid eastidit vašširihkkumiid ja lasihit máhtu.
Sara Skum sávvá ahte raportas leat bohtosat boahtteáigai.
– Mon sávan ahte dat lokte ráŋggáštusmeari mii dan vuoru dahkka ahte čovdet rihkkumiid. Boazoeaiggadat oidnet ahte otne eai bija doarvái návccaid. Mon sávan maid ahte vašširihkkun šadda diehttelas namahus go ilmmuha boliissaide ja ahte váldet dan duohtan.