Visot iežát vástidedje gažáldahkii, muhto ii Anders Kråik, Samerna bellodat.
Håkan Jonsson dadjá ahte son ii leat giellaolmmoš, muhto son háliidivčče sámástit dievasčoahkkima sárdestuolus.
– Mon in jáhke ahte min jienasteaddjit vuhtiiváldet dahje imáštallet jus mii, politihkkarat, sámástit dahje eat sámás.
Jienasteaddjit dorjot Håkan Jonssone dien áššiš go dušše 26 proseanta oaivvildit ahte stivraságadoalli berrešii sámástit. Dan čájeha Novusiskkadeapmi maid SVT Sápi ja Sámeradio leat dahkan.
”Hui duođalaš”
Buot bellodatjođiheaddjit leat báhkodan ahte sámediggi berrešii bargat eanet sámegielanin ja dan ovdaneamis servodagas. Sii eai oro ieža bargame dan ovdii go dievasčoahkkimis eai bálljo sámás.
– Sámegiela ii ovdán go dan eai geavat dievasčoahkkimiin ja dat lea hui duođalaš ášši, dadjá Marianne Gråik, Sámiid Riikabellodaga jođiheaddji.
Son lea okta dain hárvenaš guhte sámásta sárdnestuolus ja son mieđiha ahte leai hástalus.
– Mu mielas lea hástalus sámástit. mon dáistalan dainna ja áiggun joatkit dan dahkat, dadjá son.
Sámegiella unno jienasteaddjiid gaska
Eai leat duššefal politihkkárat mat unnán sámástit. Novusiskkadeapmi čájeha dušše 29 proseanta jienasteaddjiin sámástit. Ovddit válggain sámástedje 39 proseanta .
– Mis lea hui ollu bargu juste gielageavaheamis ja ovdáneamis. Diet lea maid Sámedikki gohčus láidestit giellabarggu, dadjá Marianne Gråik.